ఆంధ్రప్రదేశ్‌లో వేసవి సెలవుల అనంతరం పాఠశాలల పునఃప్రారంభంపై రాష్ట్ర పాఠశాల విద్యాశాఖ స్పష్టత ఇచ్చింది. సోషల్ మీడియాలో స్కూళ్ల రీఓపెనింగ్ వాయిదా పడిందంటూ జరుగుతున్న ప్రచారంలో ఎలాంటి నిజం లేదని అధికారులు తెలిపారు. ముందుగా విడుదల చేసిన విద్యా సంవత్సర క్యాలెండర్ ప్రకారమే ఈ నెల 12వ తేదీ నుంచి రాష్ట్రంలోని అన్ని ప్రభుత్వ, ప్రైవేట్ పాఠశాలలు యథావిధిగా ప్రారంభమవుతాయని వెల్లడించారు.

రాష్ట్రంలో వేసవి సెలవులను పొడిగించే ప్రతిపాదన ఏదీ ప్రభుత్వ పరిశీలనలో లేదని విద్యాశాఖ పేర్కొంది. విద్యార్థులు, తల్లిదండ్రులు, ఉపాధ్యాయులు సోషల్ మీడియాలో వస్తున్న అసత్య ప్రచారాలను నమ్మవద్దని సూచించింది. అధికారిక ప్రకటనలనే పరిగణనలోకి తీసుకోవాలని విజ్ఞప్తి చేసింది.

ఇక తెలంగాణలో కూడా స్కూళ్ల ప్రారంభ తేదీపై జరుగుతున్న ప్రచారాన్ని పాఠశాల విద్యాశాఖ ఖండించింది. ఇప్పటికే ప్రకటించిన షెడ్యూల్ ప్రకారం జూన్ 14తో వేసవి సెలవులు ముగియగా, జూన్ 15 నుంచి అన్ని ప్రభుత్వ, ప్రైవేట్ పాఠశాలలు తిరిగి ప్రారంభం కానున్నాయని స్పష్టం చేసింది. 2026-27 విద్యా సంవత్సరానికి సంబంధించిన అకడమిక్ క్యాలెండర్ ఇప్పటికే విడుదల చేసిన విషయాన్ని గుర్తు చేసింది.

ఈ ఏడాది వేసవిలో తెలుగు రాష్ట్రాల్లో తీవ్ర ఎండలు నమోదయ్యాయి. కొన్ని ప్రాంతాల్లో ఉష్ణోగ్రతలు 48 డిగ్రీల సెల్సియస్ వరకు చేరుకున్నాయి. దీంతో పలు రాష్ట్రాలు వేసవి సెలవులను పొడిగించాయి. తెలంగాణలో కూడా ఎండల తీవ్రత దృష్ట్యా జూన్ 14 వరకు సెలవులు పొడిగించారు. అయితే ఆంధ్రప్రదేశ్‌లో మాత్రం ఎలాంటి మార్పులు చేయలేదని అధికారులు మరోసారి స్పష్టం చేశారు.

ప్రస్తుతం నైరుతి రుతుపవనాల ప్రభావంతో తెలుగు రాష్ట్రాల్లో వాతావరణం క్రమంగా చల్లబడుతోంది. పలు ప్రాంతాల్లో వర్షాలు కురుస్తుండటంతో ఎండల తీవ్రత కూడా తగ్గుముఖం పడుతున్నట్లు వాతావరణ శాఖ అంచనా వేస్తోంది.