ప్రముఖ తమిళ దర్శకుడు భారతీరాజా కన్నుమూశారు. కొంతకాలంగా తీవ్ర అనారోగ్యం, వృద్ధాప్య సమస్యలతో బాధపడుతున్న ఆయన చికిత్స పొందుతూ తుదిశ్వాస విడిచారు. ఆయన వయసు 84 సంవత్సరాలు. భారతీరాజా మరణవార్తతో తమిళ, తెలుగు సినీ పరిశ్రమలు విషాదంలో మునిగిపోయాయి. అభిమానులతో పాటు సినీ, రాజకీయ ప్రముఖులు సోషల్ మీడియా వేదికగా సంతాపం తెలియజేస్తున్నారు.

1977లో విడుదలైన తమిళ చిత్రం 16 Vayathinile ద్వారా దర్శకుడిగా పరిచయమైన భారతీరాజా, గ్రామీణ నేపథ్య కథలకు కొత్త ఒరవడి తీసుకొచ్చారు. సహజత్వానికి పెద్దపీట వేస్తూ ఆయన రూపొందించిన చిత్రాలు ప్రేక్షకుల హృదయాలను తాకాయి.

తెలుగు సినీ పరిశ్రమలోనూ ఆయన చెరగని ముద్ర వేశారు. ఆయన దర్శకత్వంలో వచ్చిన సీతాకోకచిలుక చిత్రం క్లాసిక్ ప్రేమకథగా నిలిచి ప్రేక్షకాదరణ పొందింది. అనంతరం ఆరాధన, జమదగ్ని, ఈతరం ఇల్లాలు వంటి చిత్రాల ద్వారా తనలోని వైవిధ్యాన్ని, సామాజిక స్పృహను చాటిచెప్పారు.

కథలోని భావోద్వేగాలను వెండితెరపై అద్భుతంగా ఆవిష్కరించడంలో భారతీరాజా శైలి ప్రత్యేకమైనది. ఆయన చిత్రాలు ఎంతోమంది యువ దర్శకులకు స్ఫూర్తిగా నిలిచాయి. భారతీయ సినీ చరిత్రలో ఆయన సేవలు చిరస్థాయిగా నిలిచిపోతాయి.