జైపూర్ వేదికగా జరిగిన ఈ పోరులో పంజాబ్ టాస్ గెలిచి ముందుగా బౌలింగ్ ఎంచుకుంది. కెప్టెన్ నిర్ణయాన్ని సమర్థిస్తూ అర్ష్‌దీప్ సింగ్ ఇన్‌స్వింగ్, ఔట్‌స్వింగ్ బంతులతో సిక్కిం బ్యాటర్లకు చుక్కలు చూపించాడు. ఫలితంగా అతడు ఐదు వికెట్లు పడగొట్టి మ్యాచ్‌ను ఏకపక్షంగా మార్చాడు. అర్ష్‌దీప్ దెబ్బకు సిక్కిం జట్టు 22.2 ఓవర్లలో కేవలం 75 పరుగులకే ఆలౌటైంది. అతడికి తోడు సుఖ్‌దీప్ బజ్వా, మయాంక్ మార్కండే చెరో రెండు వికెట్లు తీసి పంజాబ్ బౌలింగ్ ఆధిపత్యాన్ని మరింత పెంచారు. సిక్కిం బ్యాటర్లలో కొద్దిమంది మాత్రమే రెండు అంకెల స్కోరు చేయగలిగారు. చిన్న లక్ష్యాన్ని ఛేదించేందుకు దిగిన పంజాబ్ బ్యాటర్లు ఏమాత్రం ఒత్తిడికి గురికాకుండా 6.2 ఓవర్లలోనే వికెట్ నష్టంలేకుండా విజయం సాధించారు. ప్రభ్‌సిమ్రాన్ సింగ్ అర్ధశతకంతో మెరిశాడు. ఈ విజయంలో అర్ష్‌దీప్ సింగ్ ప్రదర్శన మ్యాచ్‌కే హైలైట్‌గా నిలిచింది.